Janavaradhi | Online News


ఇంకా బోణి కోట్టని కోహ్లి, రహానె..!


ఐపిఎల్ 2019 సీజన్‌లో ఆసక్తికరమైన సమరానికి ఈరోజు జైపూర్ వేదిక అవుతోంది. సీజన్ ప్రారంభమై పదిరోజులు గడిచినా.. ఇప్పటికీ గెలుపు రుచి చూడని రాయల్ ఛాలెంజర్స్ బెంగళూరు, రాజస్థాన్ రాయల్స్ మధ్య ఈరోజు రాత్రి 8 గంటలకి మ్యాచ్ జరగనుంది. టోర్నీ ఆరంభం నుంచి పేలవ ప్రదర్శనతో బెంగళూరు జట్టు మూడు మ్యాచ్‌ల్లోనూ నిరాశపచగా.. గెలుపు ముంగిట రాజస్థాన్ బోర్లాపడుతూ వస్తోంది. ఈ నేపథ్యంలో.. కనీసం ఈరోజైనా మ్యాచ్‌లో గెలిచి బోణి కొట్టాలని రెండు జట్లూ ఆశిస్తున్నాయి. 
 
టోర్నీ తొలి మ్యాచ్‌లో చెన్నై సూపర్ కింగ్స్‌ దెబ్బకి 7 వికెట్ల తేడాతో ఓడిన బెంగళూరు టీమ్.. ఆ తర్వాత ముంబయితో మ్యాచ్‌లో గెలిచే అవకాశాలు కనిపించినా.. ఆఖర్లో తడబడి విజయానికి దూరమైంది. ఇక ఇటీవల హైదరాబాద్ జరిగిన మ్యాచ్‌లో మరీ ఘోరంగా 118 పరుగుల భారీ తేడాతో ఓడిపోయి ఇప్పుడు పూర్తి నిరాశలో కూరుకుపోయింది. ముఖ్యంగా.. బెంగళూరు కెప్టెన్ విరాట్ కోహ్లీ పేలవ ఫామ్‌తో నిరాశపరుస్తుండగా.. ఏబీ డివిలియర్స్‌ నిలకడగా రాణించలేకపోతున్నాడు. మరోవైపు బౌలింగ్‌లోనూ ఆ జట్టు తేలిపోతోంది. చాహల్ మెరుస్తున్నా.. ఉమేశ్ యాదవ్, గ్రాండ్ హోమ్, సిరాజ్ ధారళంగా పరుగులు సమర్పించుకుంటున్నారు. మొత్తంగా.. గెలుపు రుచి చూస్తే.. తప్ప బెంగళూరు గాడిన పడే అవకాశాలు కనిపించడం లేదు. 
 
రాజస్థాన్ రాయల్స్.. టోర్నీలో ఆడిన తొలి మ్యాచ్‌లోనే పంజాబ్‌పై గెలిచేలా కనిపించినా.. అశ్విన్ మాన్కడింగ్ రనౌట్ కారణంగా.. ఆఖర్లో ఒత్తిడికి గురై 14 పరుగుల తేడాతో విజయాన్ని దూరం చేసుకుంది. ఆ తర్వాత హైదరాబాద్ చేతిలో 5 వికెట్ల తేడాతో ఓడిన రాజస్థాన్.. ఇటీవల చెన్నై సూపర్ కింగ్స్‌పై దాదాపు గెలిచేసేలా కనిపించింది. కానీ.. చివర్లో డ్వేన్ బ్రావో.. బ్యాట్స్‌మెన్‌ను కట్టడి చేయడంతో 8 పరుగుల తేడాతో ఓడింది. ఓపెనర్ జోస్ బట్లర్ నిలకడలేమీ ఆ జట్టుని దెబ్బతీస్తుండగా.. కెప్టెన్ అజింక్య రహానె, మిడిలార్డర్ బ్యాట్స్‌మెన్ సంజు శాంసన్ రాణిస్తున్నారు. కానీ.. స్టీవ్‌స్మిత్, బెన్‌స్టోక్స్, గౌతమ్, రాహుల్ త్రిపాఠి ఇంకా లయ అందుకోవాల్సి ఉంది. అయితే.. బ్యాటింగ్‌తో పోలిస్తే.. బౌలింగ్‌లో రాజస్థాన్ బలంగా కనిపిస్తోంది. జోప్రా ఆర్చర్.. ఆ జట్టు ప్రధాన ఆయుధం. 





POLL