Janavaradhi | Online News


‘కోబ్రా’తో నటుడిగా అవతారమెత్తిన వర్మ...


సంచలనాల దర్శకుడు రామ్ గోపాల్ వర్మ కొత్త అవతారమెత్తారు. ఇప్పటి వరకు మెగా ఫోన్ పట్టుకుని స్టార్ట్ కెమెరా, యాక్షన్ అని మాత్రమే చెప్పిన వర్మ.. ఇప్పుడు తానే స్వయంగా నటిస్తున్నారు. ‘కోబ్రా’ అనే సినిమాతో నటుడిగా పరిచయమవుతున్నారు. రామ్ గోపాల్ వర్మ, అగస్త్య మంజు సంయుక్త దర్శకత్వంలో ఆర్జీవి గన్ షాట్ ప్రొడక్షన్స్ బ్యానర్‌పై డి.పి.ఆర్ నిర్మిస్తున్న ఈ మూవీ ఫస్ట్ లుక్ పోస్టర్‌ను ఆదివారం వర్మ పుట్టినరోజు సందర్భంగా విడుదల చేశారు. ఈ పోస్టర్‌తోనే ప్రేక్షకుల్లో సినిమాపై ఆసక్తిని వర్మ అమాంతం పెంచేశారు. మరో సంచలనానికి తెరలేపారు. 
 
అత్యంత ప్రమాదకరమైన ఒక క్రిమినల్ బయోపిక్‌‌గా ‘కోబ్రా’ను తెరకెక్కిస్తున్నారు. హిందీ, తెలుగు భాషల్లో ఈ చిత్రం రూపొందుతోంది. ఇటీవల విడుదలై విజయం సాధించిన ‘లక్షీస్ ఎన్టీఆర్’ మాదిరిగానే ఈ సినిమాను కూడా రామ్ గోపాల్ వర్మ, అగస్త్య మంజు కలిసి డైరెక్ట్ చేస్తున్నారు. ప్రముఖ సంగీత దర్శకుడు ఎం.ఎం కీరవాణి ఈ సినిమాకు సంగీతం సమకూరుస్తుండటం విశేషం. ఇంటెలిజన్స్ ఆఫీసర్ పాత్రలో రామ్ గోపాల్ వర్మ నటిస్తుండగా, క్రిమినల్ పాత్రలో కె.జి అనే కొత్త యాక్టర్ నటిస్తున్నారు. ముఖ్యమంత్రి కేసీఆర్ పాత్రను రంగారావు అనే నటుడు పోషిస్తున్నారు. 
 
ఫస్ట్‌లుక్ పోస్టర్‌పై ప్రచురించిన కొన్ని వాక్యాలు చాలా ఆసక్తికరంగా ఉన్నాయి. ‘వాడిని కానీ అరెస్ట్ చేస్తే, సగం పోలీస్ డిపార్ట్‌మెంట్ జైల్లోకెళ్తుంది’ అని ప్రచురించారు. అంటే ఈ మోస్ట్ డేంజరెస్ క్రిమినల్‌తో సగం పోలీసులకు సంబంధాలున్నాయని వర్మ చెప్పకనే చెబుతున్నారు. మొత్తం మీద మరో భయంకరమైన క్రైమ్ స్టోరీని వర్మ తెరకెక్కిస్తున్నారని అర్థమవుతోంది. ‘కోబ్రా’ నుంచి వర్మ ఫస్ట్‌లుక్ విడుదల కాగానే బాలీవుడ్ మెగాస్టార్ బిగ్ బి అమితాబ్ బచ్చన్ ట్విట్టర్ ద్వారా స్పందించారు. 





POLL