Janavaradhi | Online News


ధోనీకి జరిమానా.. తృటిలో తప్పిన నిషేధం


ఐపీఎల్‌ 2019 సీజన్‌లో చెన్నై సూపర్ కింగ్స్ కెప్టెన్ మహేంద్రసింగ్ ధోనీ వారం వ్యవధిలోనే రెండు సార్లు సహనం కోల్పోయాడు. సుదీర్ఘకాలంగా ‘కెప్టెన్‌ కూల్‌’గా పేరొందిన ధోనీ.. ఇటీవల వరుసగా రెండు నోబాల్స్ విసిరిన చెన్నై ఫాస్ట్ బౌలర్ దీపక్ చాహర్‌పై మైదానంలోనే ఆగ్రహం వ్యక్తం చేశాడు. ఆ తర్వాత మ్యాచ్ వ్యవధిలోనే తాజాగా రాజస్థాన్ రాయల్స్‌తో గురువారం రాత్రి జరిగిన మ్యాచ్‌లో నోబాల్ విషయమై ఫీల్డ్ అంపైర్లతో పెద్ద ఎత్తున వాగ్వాదానికి దిగాడు. దీంతో.. ఐపీఎల్ క్రమశిక్షణ నియమావళి కింద ధోనీ మ్యాచ్‌ ఫీజులో 50 శాతం జరిమానా విధించారు. వాస్తవానికి ఫీల్డ్ అంపైర్లతో అతిగా వాగ్వాదానికి దిగితే.. సదరు ఆటగాడిపై ఒక టెస్టు లేదా రెండు వన్డేల నిషేధం పడుతుంది. కానీ.. ధోనీ కొద్దిలో ఆ నిషేధం వేటు నుంచి తప్పించుకున్నట్లు తెలుస్తోంది. 
 
అసలు ఏం జరిగిందంటే..? 152 పరుగుల లక్ష్య ఛేదనకు దిగిన చెన్నై జట్టు విజయానికి ఆఖరి 6 బంతుల్లో 18 పరుగులు అవసరమయ్యాయి. దీంతో.. రాజస్థాన్ కెప్టెన్ రహానె.. ఫాస్ట్ బౌలర్ బెన్‌స్టోక్స్ చేతికి బంతినిచ్చాడు. అయితే.. ఆ ఓవర్‌లో తొలి బంతికే జడేజా(9 నాటౌట్: 4 బంతుల్లో 1x6) సిక్స్ కొట్టగా.. రెండో బంతిని నోబాల్‌గా బెన్‌స్టోక్స్ విసిరాడు. దీంతో.. ఒక సింగిల్‌తో కలిపి రెండు పరుగులు చెన్నైకి లభించాయి. తర్వాత ఫ్రీహిట్ బంతికి ధోనీ డబుల్ రాబట్టగా.. మూడో బంతికి పుంజుకున్న బెన్‌స్టోక్స్.. ధోనీ(58: 43 బంతుల్లో 2x4, 3x6)ని క్లీన్‌బౌల్ చేసి మ్యాచ్‌ను ఉత్కంఠగా మార్చేశాడు. 
 
గెలుపు సమీకరణం 3 బంతుల్లో 5 పరుగులుగా మారిపోగా.. నాలుగో బంతిని హై ఫుల్‌టాస్ రూపంలో బెన్‌స్టోక్స్ విసిరాడు. దాన్ని కనెక్ట్ చేసిన మిచెల్ శాంట్నర్ (10 నాటౌట్: 3 బంతుల్లో 1x6) రెండు పరుగులు రాబట్టాడు. కానీ.. ఈ బంతిని తొలుత నాన్‌స్ట్రైక్‌ ఎండ్‌లోని అంపైర్ ఉల్లాస్ నోబాల్(హైట్)గా ప్రకటించాడు. అయితే.. లెగ్ అంఫైర్ బ్రూస్‌ ఆక్సన్‌ఫర్డ్ మాత్రం ఆ నిర్ణయాన్ని వ్యతిరేకిస్తూ.. ఉల్లాస్‌ని ఆ నోబాల్ నిర్ణయాన్ని వెనక్కి తీసుకోమన్నాడు. దీంతో.. లెగ్ అంపైర్ నిర్ణయానికే ఉల్లాస్ కట్టుబట్టాడు. ఇక్కడే మ్యాచ్‌లో రచ్చ మొదలైంది. అంపైర్ తన నిర్ణయాన్ని వెనక్కి తీసుకోవడంతో ఆగ్రహం వ్యక్తం చేసిన ధోనీ.. చెన్నై డగౌట్ నుంచి మైదానంలోకి వచ్చి మరీ అంపైర్లతో గొడవకి దిగాడు. కానీ.. అంపైర్లు నోబాల్ ఇవ్వలేదు. ఆ తర్వాత ఐదో బంతికి రెండు పరుగులు రాబట్టిన శాంట్నర్.. ఆఖరి బంతిని సిక్స్‌గా మలిచి చెన్నైని గెలిపించాడు. 





POLL