Janavaradhi | Online News


పెవిలియన్‌కి వెళ్తూ బెయిల్స్‌ను పడగొట్టిన రోహిత్ కు జరిమానా..


ఐపీఎల్‌లో ఫీల్డ్ అంపైర్ నిర్ణయంపై అసంతృప్తి వ్యక్తం చేసిన ముంబయి ఇండియన్స్ కెప్టెన్ రోహిత్ శర్మపై జరిమానా పడింది. కోల్‌కతా నైట్‌రైడర్స్‌తో ఆదివారం రాత్రి జరిగిన మ్యాచ్‌లో ఎల్బీడబ్ల్యూగా ఔటైన  రోహిత్ శర్మ.. పెవిలియన్‌కి వెళ్తూ నాన్‌స్ట్రైక్ ఎండ్‌లోని బెయిల్స్‌ను బ్యాట్‌తో పడగొట్టాడు. దీంతో.. క్రమశిక్షణ తప్పిన రోహిత్‌పై మ్యాచ్ ఫీజులో 15 శాతం జరిమానా విధించారు. అసలు ఏం జరిగిందంటే..? ఈడెన్‌ గార్డెన్స్ వేదికగా జరిగిన మ్యాచ్‌లో ఆండ్రీ రసెల్ (80 నాటౌట్: 40 బంతుల్లో 6x4, 8x6), ఓపెనర్లు శుభమన్ గిల్ (76: 45 బంతుల్లో 6x4, 4x6), క్రిస్‌లిన్ (54: 29 బంతుల్లో 8x4, 2x6) హాఫ్ సెంచరీలు బాదడంతో టాస్ ఓడి తొలుత బ్యాటింగ్ చేసిన కోల్‌కతా జట్టు 2 వికెట్ల నష్టానికి 232 పరుగుల భారీ స్కోరు చేసింది. అనంతరం ఛేదనకి దిగిన ముంబయి ఇండియన్స్ జట్టు ఆరంభంలోనే ఓపెనర్ డికాక్ (0) వికెట్ చేజార్చుకోగా.. మరో ఓపెనర్ రోహిత్ శర్మ (12: 9 బంతుల్లో 3x4) కూడా ఇన్నింగ్స్ నాలుగో ఓవర్‌లో గర్నీ విసిరిన బంతిని అర్థం చేసుకోలేక ఎల్బీడబ్ల్యూగా ఔటయ్యాడు. 
 
గర్నీ విసిరిన ఫుల్‌ లెంగ్త్ బంతిని రోహిత్ శర్మ హిట్ చేయబోగా.. అది బ్యాట్‌కి అందకుండా నేరుగా వెళ్లి అతని ఫ్యాడ్స్‌ను తాకింది. దీంతో.. కోల్‌కతా ఎల్బీడబ్ల్యూ కోసం అప్పీల్ చేయగా.. ఫీల్డ్ అంపైర్ నితిన్ మీనన్ వేలెత్తాశాడు. కానీ.. అంపైర్ నిర్ణయంపై అనుమానం వ్యక్తం చేసిన రోహిత్ శర్మ.. డీఆర్‌ఎస్ కోరగా.. బంతి వికెట్లను తాకేలా రిప్లైలో కనిపించింది. దీంతో.. అంపైర్ తన మునుపటి నిర్ణయానికే కట్టుబడగా.. రోహిత్ శర్మ పెవిలియన్‌కి వెళ్తూ.. నాన్‌స్ట్రైక్ ఎండ్‌లోని వికెట్లపై ఉన్న బెయిల్స్‌ను బ్యాట్‌తో పడగొట్టాడు. దీంతో.. అతనిపై క్రమశిక్షణ చర్యలు తీసుకున్నారు. ఈ మ్యాచ్‌లో పవర్ హిట్టర్ హార్దిక్ పాండ్య (91: 34 బంతుల్లో 6x4, 9x6) భారీ సిక్సర్లు బాదినా.. ఆఖరికి ముంబయి 34 పరుగుల తేడాతో ఓడిపోయింది. 





POLL