Janavaradhi | Online News


హైదరాబాద్: ఐదు గంటల్లో నిర్మించిన‌ రైల్వే అండర్‌పాస్...


రైల్వే పట్టాల కింద నుంచి అండర్ పాస్ నిర్మాణం అంటే మాటలు కాదు. అలా చేయాలంటే కొన్ని నెలల సమయం పడుతుంది. నిర్మాణ సమయంలో రైళ్ల రాకపోకలకు కూడా విఘాతం ఏర్పడుతుంది. అయితే రైల్వే అసాధ్యాన్ని సాధ్యం చేసి చూపించింది. కేవలం ఐదు గంటల వ్యవధిలో రాత్రికి రాత్రే పియూపీ (పెడస్టేరియన్ అండర్ పాస్)ను నిర్మించి ఔరా అనిపించింది. అమీర్‌పేటలోని లీలానగర్ - బేగంపేట మధ్యలో రైల్వే ట్రాక్ ఉంది. బేగంపేట బస్తీవాసులు అమీర్‌పేట వచ్చేందుకు రైలు పట్టాలు దాటాల్సి వస్తోంది. ఈ సందర్భంగా ఎంఎంటీఎస్ రైళ్లు ఢీకొని చాలామంది మృతి చెందారు. దీన్ని సీరియస్‌గా తీసుకున్న ప్రభుత్వం 2017లో ఈ ప్రాజెక్టుకు ప్రణాళిక తయారు చేసింది. పీయూపీ నిర్మాణం కోసం జీహెచ్ఎంసీ రూ.2.18 కోట్లను రైల్వేకు కేటాయించింది. 
 
అయితే, రైల్వే నుంచి అనుమతులు ఆలస్యం కావడంతో పనులు ముందు సాగలేదు. ఎట్టకేలకు శనివారం అర్ధరాత్రి (ఆదివారం తెల్లవారుజాము) తర్వాత అటుగా రైళ్ల రాకపోకలను నిలిపివేసి 12 గంటల నుంచి పనులు మొదలుపెట్టారు. ఆదివారం తెల్లవారుజాము 5.30 గంటలకల్లా పట్టాలు తీసేసి, మట్టిని తవ్వి 8 కాంక్రీట్ బ్లాకులను అమర్చి నిర్మాణం పూర్తిచేసి ఆశ్చర్యపరిచారు. ఆ తర్వాత పట్టాలను యథావిధిగా అమర్చడంతో రైళ్ల రాకపోకలు కొనసాగాయి. ఇలా ఐదు గంటల వ్యవధిలో నిర్మాణం పూర్తి చేయడం తెలంగాణలో ఇదే తొలిసారని రైల్వే అధికారులు తెలిపారు. ఈ బ్లాకుల నిర్మాణానికి సంబంధించిన పూర్తి బాధ్యతలను రైల్వేనే తీసుకుంది. 400 టన్నుల భారీ క్రేన్, జేసీబీలతో పనులు చకచకా పనులు పూర్తిచేశారు. ఇదివరకు ఏపీలోని పెందుర్తి - కొత్తవలసలో అండర్ పాస్‌ను సైతం ఇలాగే రికార్డు సమయంలో పూర్తి చేసి రైల్వే ఆశ్చర్యపరిచింది.





POLL