Janavaradhi | Online News


ఆహ్లాదకర వాతావరణంలో ఆంధ్రప్రదేశ్ క్యాబినెట్ సమావేశం...


కేంద్ర ఎన్నికల కమిషన్ ఆమోదం లభించడంతో ఏపీ క్యాబినేట్ సమావేశం మంగళవారం సాయంత్రం నిర్వహించిన విషయం తెలిసిందే. ఆంధ్రప్రదేశ్‌లో శాసనసభ ఎన్నికలు జరగడంతో ఇదే చివరి మంత్రివర్గ సమావేశం కావడం, సీఎం, సీఎస్ మధ్య కోల్డ్‌వార్ సాగిన నేపథ్యంలో దీనికి ప్రాధాన్యత ఏర్పడింది. గత ఎన్నికల్లో టీడీపీ ప్రభుత్వం అధికారంలోకి వచ్చిన తర్వాత నిర్వహించిన 108వ క్యాబినెట్ సమావేశం కావడం మరో విశేషం. అయితే, క్యాబినెట్ భేటీ ఉల్లాసభరిత వాతావరణంలో సాగింది. క్యాబినెట్ భేటీ నిర్వహించడంలో రాష్ట్ర ప్రభుత్వ ప్రధాన కార్యదర్శి ఎల్వీ సుబ్రమణ్యం క్రియాశీలకంగా వ్యవహరించారు. మంత్రివర్గ సమావేశ మందిరంలోకి సీఎం చంద్రబాబు రాకముందే సీఎస్ అక్కడికి చేరుకున్నారు. మంత్రులందరి దగ్గరకూ స్వయంగా వెళ్లి కరచాలనం చేశారు. 
 
ముఖ్యమంత్రి వచ్చిన తర్వాత ఆయన పక్కనే సీఎస్‌ కూర్చున్నారు. అనంతరం అందరికీ ఆహ్వానం పలికి ఆయన సమావేశం ఎజెండాని వివరించారు. ఏ అంశం గురించి మాట్లాడాల్సి వచ్చినా ‘గౌరవనీయ ముఖ్యమంత్రి చెప్పినట్టు... ఆదేశించినట్టు’ అని ప్రస్తావిస్తూ మాట్లాడటం విశేషం. ప్రత్యేకంగా ముఖ్యమంత్రికే ఏదైనా విషయం గురించి చెప్పాలనుకున్నప్పుడు, మైక్‌ ఆపుచేసి ఆయనకు వివరించారు. ‘ఇది 108వ క్యాబినెట్ సమావేశం. ఇందులోని అంకెలన్నీ కూడితే తొమ్మిది సంఖ్య వస్తుంది. దీన్ని అదృష్ట సంఖ్యగా భావిస్తారు. ఇలాంటి అరుదైన సమావేశంలో పాల్గొనేందుకు నాకు అవకాశమిచ్చినందుకు మీ అందరికీ ధన్యవాదాలు. 
 
ఇది నా అదృష్టంగా భావిస్తున్నాను’ అని ముఖ్యమంత్రిని, ఆయన మంత్రులను ఉద్దేశించి సీఎస్ సుబ్రమణ్యం వ్యాఖ్యానించారు. దీనికి స్పందించిన చంద్రబాబు ‘తొమ్మిది చాలా శక్తివంతమైన సంఖ్య, అందరికీ శుభప్రదమే కదా’అని నవ్వుతూ చమత్కరించారు. సమావేశం ఊహించినదానికంటే భిన్నంగా చాలా సుహృద్భావ వాతావరణంలో జరిగిందని కొందరు మంత్రులు వ్యాఖ్యానించారు. ఎల్వీ సుబ్రమణ్యం సోమవారం ముఖ్యమంత్రి నివాసానికి వెళ్లి ఆయనతో అరగంటకుపైగా భేటీ అవడం, పలు అంశాలపై ఆయనతో చర్చించడంతో వాతావరణం కొంత తేలికపడింది. ఈసీ ఆమోదం తెలిపిన ఎజెండాకి కట్టుబడే సమావేశం నిర్వహించారు. 





POLL