Janavaradhi | Online News


ఎన్నికల ప్రచారంలో కమల్ హాసన్‌పైకి చెప్పులు...


ప్రముఖ నటుడు, మక్కల్ నీది మయ్యం అధ్యక్షుడు కమల్ హాసన్ ఇటీవల హిందూ ఉగ్రవాదం అంటూ చేసిన వ్యాఖ్యలు ఆయనకు చిక్కులు తెచ్చిపెడుతున్నాయి. ఇప్పటికే కమల్‌పై హిందత్వవాదులు, బీజేపీ నాయకులు తీవ్ర ఆగ్రహం వ్యక్తం చేస్తున్నారు. ఈ క్రమంలో ఆయనకు చేదు అనుభవం ఎదురైంది. కమల్‌ ఎన్నికల ర్యాలీలో మాట్లాడుతుండగా కొందరు ఆయనపైకి చెప్పులు విసిరారు. అయితే ఆవి ఆయనకు తగల్లేదు. వెంటనే కమల్ అభిమానులు, కార్యకర్తలు స్పందించి ఆయనకు రక్షణ వలయంగా నిలిచారు. 
 
కమల్‌ హాసన్‌ బుధవారం మదురై అసెంబ్లీ నియోజకర్గ పరిధిలోని తిరుప్పరాన్‌కుంద్రమ్‌లో ఎన్నికల ర్యాలీ చేపట్టారు. వాహనంపై నిల్చుని కమల్‌ ప్రసంగిస్తుండగా కొందరు వ్యక్తులు ఆయనపైకి చెప్పులు విసిరారు. అయితే అవి కమల్‌ వాహనానికి తగిలి కిందపడ్డాయి. ఈ ఘటనపై కమల్‌ అభిమానులు, కార్యకర్తలు తీవ్ర ఆగ్రహం వ్యక్తం చేశారు. మొత్తం 11 మందిపై పోలీసులకు ఫిర్యాదు చేశారు. వీరిలో భాజపా నేతలు, హనుమాన్‌ సేన సభ్యులు కూడా ఉన్నారు. కేసు నమోదు చేసుకున్న పోలీసులు ఇప్పటివరకు ఒకరిని అదుపులోకి తీసుకున్నట్లు తెలిపారు. 
 
మరోవైపు, కమల్‌కు వ్యతిరేంగా మదురైలో హిందూ సంఘాలు ధర్నాలు చేపట్టాయి. బీజేపీ కార్యకర్తలు సైతం ఈ ధర్నాలో పెద్దఎత్తున పాల్గొనడంతో మదురైలో కమల్ బసచేసిన హోటల్ వద్ద భారీగా పోలీసులను మోహరించారు. ‘స్వతంత్ర భారతంలో తొలి ఉగ్రవాది ఓ హిందువు. ఆయన పేరు నాథూరామ్‌ గాడ్సే’ అంటూ కమల్‌ ఇటీవల ఎన్నికల ప్రచారంలో భాగంగా వ్యాఖ్యానించారు. ముస్లింలు అధికంగా ఉన్న ప్రాంతానికి వచ్చాను కాబట్టి తాను ఇలా మాట్లాడటం లేదని మహాత్మ గాంధీ విగ్రహం ఎదుట ఈ మాటలు అంటున్నానని కూడా వ్యాఖ్యానించారు. ఈ వ్యాఖ్యలు తీవ్ర దుమారానికి దారితీశాయి. కమల్‌పై కేసు కూడా నమోదైంది. దీంతో ఆయన మద్రాసు హైకోర్టులో ముందస్తు బెయిల్‌ కోసం దరఖాస్తు చేసుకున్నారు. దీనిపై న్యాయస్థానం నేడు విచారణ జరపనుంది. 





POLL