Janavaradhi | Online News


దొంగగా మారిన టెన్నిస్ కోచ్...


పేరుకి టెన్నిస్ కోచ్.. కానీ, చేసేవి దొంగ పనులు. తాను కోచింగ్ ఇచ్చే పిల్లల తల్లిదండ్రులను మచ్చిక చేసుకోవడం, వారితో చనువు పెంచుకుని ఇళ్లకు వెళ్లి రెక్కీ నిర్వహించడం. ఆ తరవాత తాళం వేసిన ఇళ్లలో దూరి దొంగతనాలు చేయడం. వ్యసనాలకు బానిసైన ఓ టెన్నిస్ కోచ్ చేస్తోన్న కేటు పనులివి. ఇలాంటి కేటుగాడు అనుకోకుండా పోలీసులకు చిక్కాడు. పోలీసులు తమదైన శైలిలో ప్రశ్నించగా చేసిన తప్పులన్నీ ఒప్పుకున్నాడు. బుధవారం కేపీహెచ్‌బడీ పోలీస్ స్టేషన్‌లో ఏర్పాటు చేసిన విలేకరుల సమావేశంలో మాదాపూర్ జోన్ డీసీపీ వెంకటేశ్వర్‌రావు, కూకట్‌పల్లి ఏసీపీ సురేందర్‌రావు వెల్లడించిన వివరాలు ఇలా ఉన్నాయి. 
 
తూర్పుగోదావరి జిల్లా రాజమండ్రిలోని సుబ్బారావుపేటకు చెందిన కోమలి రామకృష్ణ(24) రెండేళ్ల నుంచి హైదరాబాద్‌లోని శాతవాహననగర్‌ కాలనీలో నివసిస్తూ టెన్నిస్‌ కోచ్‌గా పనిచేస్తున్నాడు. వ్యసనాలకు బానిసైన అతడు డబ్బుల కోసం దొంగతనాలు చేయడం ప్రారంభించాడు. ఈ క్రమంలో తన వద్ద శిక్షణ పొందే చిన్నారుల తల్లిదండ్రులతో పరిచయాలు పెంచుకొని వారి ఇంటి పరిసరాలను గమనించి దొంగతనానికి ప్రణాళికలు రూపొందించుకునేవాడు. గతనెల 27వ తేదీన సర్దార్‌ పటేల్‌నగర్‌లో ఓ డాక్టర్‌ కుటుంబం ఊర్లో లేని సమయంలో ఇంటి తాళాలు పగులగొట్టి చోరీ చేశాడు. మరో ఇంట్లోనూ చోరీకి పాల్పడ్డాడు. 
 
బాధితుల ఫిర్యాదుతో పోలీసులు విచారణ చేపట్టారు. సీసీటీవీ ఫుటేజీలు పరిశీలించారు. బుధవారం ఉదయం 7 గంటల సమయంలో సర్దార్‌పటేల్‌ నగర్‌ వద్ద అనుమానాస్పదంగా తిరుగుతున్న రామకృష్ణను కేపీహెచ్‌బీ కానిస్టేబుల్స్‌ పురందాస్‌, నవీన్‌కాంత్‌ అదుపులోకి తీసుకున్నారు. స్టేషన్‌కు తీసుకెళ్లి విచారించగా రెండు దొంగతనాల కేసుల్లో నిందితుడని తేలింది. అతడి నుంచి సుమారు రూ.5 లక్షల విలువ చేసే పదకొండున్నర తులాల బంగారు నగలు, రెండున్నర కిలోల వెండి వస్తువులు, ద్విచక్రవాహనం, ఎల్‌ఈడీ టీవీ, మిక్సీ స్వాధీనం చేసుకున్నారు. నిందితుడిని రిమాండ్‌కు తరలించారు. రామకృష్ణపై రాజమండ్రిలోనూ నాలుగు కేసులు ఉన్నట్లు డీసీపీ వెల్లడించారు. 





POLL