Janavaradhi | Online News


ఉద్యోగులపై వరాల జల్లు కురిపించిన‌ సీఎం జగన్...


ఆంధ్రప్రదేశ్ సచివాలయ ఉద్యోగులకు ముఖ్యమంత్రి వైఎస్ జగన్ మోహన్ రెడ్డి వరాలు ప్రకటించారు. ముఖ్యమంత్రి పదవి చేపట్టాక శనివారం (జూన్ 8) తొలిసారి సచివాలయంలో అడుగుపెట్టిన సీఎం జగన్.. గ్రీవెన్స్‌ హాల్‌లో ఉద్యోగులతో సమావేశమయ్యారు. ఈ సందర్భంగా ఉద్యోగులపై వరాల జల్లు కురిపించారు. ఉద్యోగులకు 27 శాతం మధ్యంతర భృతి(ఐఆర్) ఇవ్వనున్నట్లు ప్రకటించారు. సచివాలయంలో ఒప్పంద ప్రాతిపదికన పనిచేస్తున్న ఉద్యోగులకు కూడా జీతాలు పెంచుతామని తెలిపారు. ఉద్యోగులకు ఎన్నికల్లో ఇచ్చిన హామీకి తగ్గట్టుగానే సీపీఎస్ రద్దుపై నిర్ణయం తీసుకుంటామని వారికి హామీ ఇచ్చారు. అలాగే మేనిఫెస్టోలోని హామీలన్నీ అమలు చేస్తామని స్పష్టం చేశారు. 
 
రాష్ట్రంలో అవినీతికి ఆస్కారంలేని పారదర్శక పాలన అందించడానికి ధృడ సంకల్పంతో ఉన్నామని  ముఖ్యమంత్రి జగన్ మొహన్ రెడ్డి అన్నారు. ప్రభుత్వం మంచి పాలన అందించాలంటే అందరి సహకారం కావాలని ఉద్యోగులను కోరారు. మంచి పనితీరు కనబరిచే అధికారులను సత్కారాలతో గౌరవిస్తామని సీఎం వెల్లడించారు. గత ప్రభుత్వాలతో సన్నిహితంగా పనిచేసిన వాళ్లను తాను తప్పుబట్టనన్నారు సీఎం జగన్. ముఖ్యమంత్రులతో ఉద్యోగులు సన్నిహితంగా ఉండటం సర్వసాధారణమేనన్నారు. ఉద్యోగులు తమ సమస్యలను పరిష్కరించుకోవడానికి సన్నిహితంగా ఉంటారని జగన్ అన్నారు. ఐఆర్ పెంపుతో పాటు.. సీపీఎస్‌ రద్దుపై కూడా జూన్ 9న జరగనున్న కేబినెట్‌ సమావేశంలో నిర్ణయం తీసుకుంటామని సీఎం జగన్ ఉద్యోగులకు హామీ ఇచ్చారు. సీఎం జగన్ నిర్ణయంపై ఉద్యోగులు హర్షం వ్యక్తం చేస్తున్నారు.