Janavaradhi | Online News


క్రికెట్‌కు గుడ్ బై చెప్పిన అంబటి రాయుడు....


భారత క్రికెటర్, తెలుగు తేజం అంబటి రాయుడు క్రికెట్‌లోని అన్ని ఫార్మాట్లకు రిటైర్మెంట్ ప్రకటించాడు. ఐపీఎల్‌లో కూడా తాను ఆడబోనని బీసీసీఐకు స్పష్టం చేశాడు. బీసీసీఐ వర్గాల ద్వారా ఈ విషయం తెలిసింది. ప్రపంచ కప్ జట్టుకు తనను ఎంపిక చేయకపోవడం పట్ల తీవ్ర అసంతృప్తితో ఉన్న రాయుడు ఈ నిర్ణయం తీసుకున్నట్లు తెలుస్తోంది. గాయం కారణంగా వైదొలిగిన ఆల్ రౌండర్ విజయ్ శంకర్ స్థానంలో తనను కాకుండా మయాంక్ అగర్వాల్‌ను ఎంపిక చేయడాన్ని రాయుడు జీర్ణించుకోలేకపోతున్నారని అంటున్నారు. వాస్తవానికి ప్రపంచ కప్‌లో ఆడబోయే టీమిండియాను బీసీసీఐ ప్రకటించినప్పుడు ఆ జట్టులో పంత్, రాయుడు పేర్లు లేకపోవడంతో విమర్శలు వెల్లువెత్తాయి. ఈ మధ్య కాలంలో అద్భుతంగా రాణిస్తోన్న వీరిద్దరూ లేకుండా జట్టు ఎంపిక ఏంటని అంతా ప్రశ్నించారు. 
 
దీంతో పంత్, రాయుడిని స్టాండ్-బై ప్లేయర్లుగా ఎంపిక చేశారు. శిఖర్ ధావన్ గాయం కారణంగా ప్రపంచ కప్ టోర్నీ నుంచి తప్పుకోవడంతో పంత్‌ను పిలిచారు. ఆ తరవాత విజయ్ శంకర్‌కు గాయం కావడంతో రాయుడు ఎంపిక తథ్యమని అంతా అనుకున్నారు. కానీ, రాయుడికి సెలెక్టర్లు షాక్ ఇచ్చారు. స్టాండ్-బైలో ఉన్న రాయుడిని కాదని మయాంక్ అగర్వాల్‌ను ఎంపిక చేశారు. ఈ నేపథ్యంలో రాయుడు క్రికెట్‌ నుంచి తప్పుకుంటున్నట్లు ప్రకటించాడు. అంతర్జాతీయ క్రికెట్‌లో 55 వన్డేలు ఆడిన రాయుడు 47.05 సగటుతో 1694 పరుగులు చేశాడు. వీటిలో మూడు సెంచరీలు, 10 అర్ధ శతకాలు కూడా ఉన్నాయి. అలాగే, ఆరు టీ20 మ్యాచ్‌లు ఆడిన ఈ మిడిలార్డర్ బ్యాట్స్‌మన్ కేవలం 42 పరుగులు మాత్రమే చేశాడు. ఇక అంతర్జాతీయ టెస్ట్ క్రికెట్‌లో రాయుడు భారత జట్టులో స్థానం సంపాదించలేకపోయాడు. 
 
కాగా, 2013లో జింబాబ్వేతో జరిగిన వన్డే సిరీస్‌ ద్వారా అంతర్జాతీయ క్రికెట్‌లోకి రాయుడు అడుగుపెట్టాడు. జింబాబ్వేపై తొలి వన్డే ఆడాడు. ఇక ఈ ఏడాది రాంచీలో ఆస్ట్రేలియాతో జరిగిన వన్డే మ్యాచ్ రాయుడికి ఆఖరిది. ఇదిలా ఉంటే, కిందటేడాది ఫస్ట్-క్లాస్ క్రికెట్ నుంచి రాయుడు రిటైర్మెంట్ ప్రకటించాడు. వన్డేలు, టీ20లపై ఫోకస్ చేయడానికి ఈ నిర్ణయం తీసుకున్నట్లు చెప్పాడు. కానీ, ఇప్పుడు అకస్మాత్తుగా అన్ని ఫార్మట్లాకు రిటైర్మెంట్ ప్రకటించడం గమనార్హం. 17 ఏళ్లపాటు సుధీర్ఘంగా సాగిన రాయుడు ఫస్ట్ క్లాస్ క్రికెట్ కెరీర్‌లో అతను 97 మ్యాచ్‌లు ఆడాడు. 6151 పరుగులు చేశాడు. 





POLL