Janavaradhi | Online News


కశ్మీర్ గవర్నర్‌గా బదిలీ కానున్న నరసింహన్?


తెలంగాణ గవర్నర్‌గా ఈఎస్ఎల్ నరసింహన్ సేవలు నిలిచిపోనున్నాయా? కేంద్ర ప్రభుత్వం ఆయణ్ని మరో ప్రాంతానికి బదిలీ చేయనుందా? అంటే అవుననే ఊహాగానాలు వినిపిస్తున్నాయి. నరసింహన్‌ను జమ్మూ కశ్మీర్‌కు లెఫ్టినెంట్ గవర్నర్‌గా నియమించనున్నారని విశ్వసనీయ వర్గాల సమాచారం. కశ్మీర్ విభజనతో అక్కడ జరగబోయే పరిణామాల నేపథ్యంలో ఎలాంటి అవాంఛనీయ ఘటనలు జరగకుండా పర్యవేక్షించేదుకు నరసింహన్ సరైన వ్యక్తిగా కేంద్రం భావిస్తున్నట్లు తెలుస్తోంది. నరసింహన్‌కు గతంలో కేంద్ర ఇంటలీజెన్స్ డైరెక్టర్‌గా పని చేసిన అనుభవం కూడా ఉంది. అంతేకాకుండా తెలంగాణ ఉద్యమ సమయంలో తీవ్ర ఉద్రిక్త పరిస్థితులు నెలకొన్నప్పుడు నాటి కేంద్ర ప్రభుత్వం నరసింహన్‌ను ఉమ్మడి ఆంధ్ర ప్రదేశ్‌కు గవర్నర్‌గా నియమించి సత్ఫలితాలు సాధించింది. ఆ సమయంలో బాధ్యతలు చేపట్టిన నరసింహన్ శాంతి భద్రత విషయంలో కచ్చితంగా వ్యవహరించారు. 
 
ఈ అనుభవాన్ని దృష్టిలో ఉంచుకొని, విభజన నేపథ్యంలో కశ్మీర్‌లో కూడా ఎలాంటి ఘర్షణలకు తావు లేకుండా శాంతి భద్రతల పర్యవేక్షణకు నరసింహన్‌ను లెఫ్టినెంట్ గవర్నర్‌గా నియమించాలనే యోచనలో కేంద్రం ఉన్నట్లు తెలుస్తోంది. నరసింహన్‌ 2009 డిసెంబర్‌లో ఉమ్మడి ఆంధ్రప్రదేశ్‌కు గవర్నర్‌గా నియమితుయ్యారు. రాష్ట్ర విభజన అనంతరం కూడా ఇరు రాష్ట్రాలకు ఉమ్మడి గవర్నర్‌గా కొనసాగి, రెండు రాష్ట్రాల మధ్య పాలనా వ్యవహారాల్లో కీలకంగా వ్యవహరించారు. ఈ డిసెంబర్‌ నాటికి ఆయన గవర్నర్‌గా పదేళ్లు పూర్తి చేసుకుంటారు. అయితే కేంద్ర ప్రభుత్వం ఇటీవల ఆంధ్ర ప్రదేశ్ గవర్నర్‌గా బీజేపీ నేత బిశ్వభూషణ్ హరిచందన్‌ను నియమించింది. ఈ నేపథ్యంలోనే తెలంగాణ కూడా కొత్త గవర్నర్‌ను నియమించి, నరసింహన్‌ను కశ్మీర్‌కు బదిలీ చేయనున్నట్లు తెలుస్తోంది. 





POLL